Hjartanlega velkomin á opnun sýningarinnar, MÝKRA EN SKUGGI, í Gallerí Göngum, laugardaginn 22. mars kl 14-16.
Alfa Rós Pétursdóttir er myndlistarkona sem brúar bilið milli samtímalistar og hefðbundins handverks.
Verk hennar einkennast af blöndu af útsaumi, flosi og öðrum handverksaðferðum en erfðaefni listar hennar samanstendur af litum, flæði og formum ásamt knýjandi þörf fyrir að kanna hið óþekkta í umhverfinu og sjálfu sér.
Alfa útskrifaðist með BA gráðu frá Gerrit Rietveld akademíunni í Amsterdam árið 2011. Eftir útskrift flutti hún aftur til Íslands, vann í hlutastarfi við listina og sýndi verk sín ásamt fullu kennslustarfi og lauk MA gráðu í Hagnýtri menningarmiðlun frá Háskóla Íslands.
Alfa Rós hefur starfað sem listamaður frá og með árinu 2018, haldið fjölda einkasýninga og tekið þátt í samsýningum. Alfa hlaut menningarstyrk frá ASS (American Scandinavian Society) árið 2023 og er skráð hjá New York galleríinu Pen&Brush.
Alfa Rós um sýninguna:
Litir hafa djúpstæð áhrif á tilfinningalíf okkar og hvernig við upplifum umhverfi okkar. Þeir geta haft sterk áhrif á skynjun okkar og eru öflugur miðill til að skapa tilfinningalega upplifun og tengingu, bæði í list og daglegu lífi.
Fyrir sýninguna “Mýkra en skuggi” voru hin séríslensku veðurafbrigði og birtuskilyrði mér hugleikin og ákvað ég að einblína á einn ákveðinn lit sem mér fannst fanga þessi veður-og birtuskilyrði. Fyrir valinu varð liturinn gulur, sem hefur í gegnum tíðina verið tákn um bjartsýni og ljós. Hann táknar orku og birtu og er jafnframt huglægur táknmiðill sem tengist lífi og hlýju. Þessa eiginleika gula litsins langaði mig að fanga og draga fram í verkunum mínum og nota til þess mismunandi textílmiðla.
Það sem gerir gula litinn jafnframt svo áhugaverðan er að hann hefur aðra eiginleika en að vera tákn ljóssins. Guli liturinn getur jafnframt verið ágengur, brothættur og jafnvel ógnvekjandi.
Þessa tvíhyggju gula litsins fannst mér áhugavert að skoða sérstaklega í tengslum vid Ísland og birtuskilyrðin og kanna hvernig þessir andstæðu eiginleikar litarins geta skapað samtal á milli ljóss og myrkurs, vonar, þyngsla og þrautseigju.
