Næstkomandi sunnudag 3. nóvember kl. 12:20 til 14:30 að lokinni fjölskylduguðsþjónustu mun Háteigskirkja leggja sitt af mörkum fyrir verkefnið Jól í skókassa sem KFUM og KFUK standa fyrir og gengur út á að útbúa jólagjafir handa munaðarlausum börnum í Úkraínu, sjá nánar hér:

Öllum áhugasömum gefst kostur á að koma saman í safnaðarheimili kirkjunnar að lokinni fjölskylduguðsþjónustu sunnudaginn 3. nóvember næstkomandi og útbúa gjafir í kassana. Falleg og gefandi samverustund fyrir fjölskyldur og alla sem áhuga hafa. Hver kassi þarf að innihalda amk einn hlut úr hverjum af eftirfarandi fimm flokkum:

1) LEIKFÖNG (t.d. lítill bíll eða dúkka …)

2) SKÓLADÓT (t.d. penni, blýantur …)

3) HREINLÆTISVARA (t.d. tannbursti, sápa …)

4) SÆLGÆTI (t.d. sleikjó, karamellur …)

5) FÖT (t.d. sokkar, húfa …)

Kirkjan útvegar skókassa (þó takmarkað magn svo að gott er að taka kassa með) og merkimiða, gjafapappír, einnig eitthvað af hreinlætisvörum og sælgæti (án endurgjalds) til að setja í kassana. Þátttakendur koma með leikföng, skólavörur, hreinlætisvörur, sælgæti og föt sem hæfa aldri og kyni þeirra barna sem þau ætla að útbúa kassann sinn fyrir.

Efst í hvern kassa þarf að leggja 500-1000 kr. seðil sem er fyrir kostnaði verkefnisins og eru þátttakendur beðnir um að hafa það meðferðis líka. Kirkjan sér um að koma tilbúnum jólakössum til KFUM og KFUK á Íslandi, sem sjá um að koma gjöfunum til barna í Úkraínu.

Við hvetjum ykkur öll til að taka þátt!