SAGA HÁTEIGSKIRKJU:
Árið 1952 var prestaköllunum fjölgað og var Háteigsprestakall var stofnað með lögum 17. júlí 1952, en árið 1963 breyttust sóknarmörk með stofnun Grensásprestakalls.
Sr. Jón Þorvarðarson kosinn lögmætri kosningu í október 1952 og þjónaði hann söfnuðinum til október 1976. Í upphafi var söfnuðurinn án kirkju, en með organista og kór. Messað var í Fossvogskirkju og í hátíðarsal Sjómannaskólans.
Ekki leið á löngu þar til upp komu hugmyndir að byggja kirkju og fengin lóð. Halldór H. Jónsson arkítekt var ráðinn til að hanna kirkjuna. Með sameiginlegu átaki sóknarnefndar, byggingarnefndar, fjáröflunarnefndar og vinnufúsra handa hófst bygging Háteigskirkju í september 1957. Þórður Jasonarson, formaður sóknarnefndar tók fyrstu skóflustunguna.
Á aðventu 1965 var ákveðið að vígja kirkjuna, þótt ýmsu væri ólokið. Var athöfnin vegleg í alla staði og fjölmenn. Biskup Íslands, hr. Sigurbjörn Einarsson vígði kirkjuna.
Sr. Arngrímur Jónsson hóf störf í janúar 1964. Hann þjónaði söfnuðinum til ársins 1993. Sr. Jón Þorvarðarson fékk lausn frá embætti í júlí 1976 og var efnt til prestskosninga sama ár. Sr. Tómas Sveinsson var skipaður í embættið í nóvember sama ár og gegndi því til ársins 2013 ásamt sr. Helgu Soffíu Konráðsdóttur, sem var ráðin að kirkjunni í október 1993.
Sr. Helga Soffía varð sóknarprestur við starfslok sr. Tómasar. Sr. Eiríkur Jóhannsson starfaði við hennar hlið frá 2014-2023 sem annar prestur kirkjunnar. Þá tók Sr. Davíð Þór Jónsson við starfi annars prests um árs tímabil 2023-2024. Frá hausti 2024 hefur Sr. Ása Laufey Sæmundsdóttir starfað við hlið Helgu Soffíu sem annar prestur Háteigskirkju.
KIRKJUBYGGINGAR HÁTEIGSKIRKJU:
Kirkjubyggingar Háteigskirkju teiknaði Halldór H. Jónsson arkítekt (f. 3. október 1912 – d. 6. febrúar 1992) . Kirkjan er basillíka að formi, sem er hefðbundið kirkjubyggingaform frá upphafi kristni. Basilikan er ferhyrnd aflöng bygging, kirkjuskipið þrí-, fimm- eða sjöskipt með súlnagöngum og breiðast í miðju, með útskoti á enda með upphækkuðum palli.
Halldór lagði áherslu á þrjá meginþætti við hönnun kirkjunnar: Hún skyldi vera falleg, hlýleg og hátíðleg. Arkítektúr Háteigskirkju er nokkuð einstakur fyrir íslenska kirkju, en þar gætir austrænna áhrifa, sem færa má rök fyrir að sjáist m.a. í oddmjóum turnum kirkjunnar, oddbogaformum glugga og dyra, sem og innandyra í útfærslu súlnaganga, gyllingu súlna og að auki í afmörkuðum skrautgarði við kirkjuna. Halldór ku hafa orðið fyrir áhrifum af heimsókn sinni til Granada á Spáni þar sem hann skoðaði La Alhambra, höll og virki byggt árin 1238-1358 af Múslimum í íslömskum byggingarstíl, þar sem gætir einnig spænskra áhrifa, Nafnið La Alhambra má þýða úr arabísku sem “rauða virkið”. Nafnið vísar til hins rauðleita steins sem virkið er byggt úr, en rauður litur er jafnframt áberandi í innréttingum Háteigskirkju. Þá er mikið um bogagöng og gyllingar í La Alhambra auk afmarkaðra lystigarða sem skrautgarðurinn við Háteigskirkju kann að bera vísanir til. Á turni La Alhambra er innfellt turnþak sem á trónir oddmjór kross sem teygir sig til himins, svo sem á við um hina fjóra turna Háteigskirkju. Byzönsk áhrif hafa oft verið nefnd þegar arkítektúr Háteigskirkju er lýst. Einnig má segja að kaþólsk áhrif hafi lifað innan veggja Háteigskirkju í meira mæli en almennt í íslenskum kirkjum, með sýnilegri áherslu á Maríu Mey sem Maríualtarið með Maríumynd úr mósaík eftir Benedikt Gunnarsson listmálara (f. 14. júlí 1929 – d. 22. nóvember 2018), hægra megin við kór kirkjunnar, ber vitni um. Hið stórfenglega og mikla Mósaíkverk Benedikts í kórnum, sem blasir við gestum kirkjunnar, ásamt Maríumyndinni, auka enn á austrænan blæ.
Pétur H. Ármannsson, arkítekt og sviðsstjóri hjá Minjastofnun Íslands, flutti fróðlegt erindi í Háteigskirkju sem hluta af fjölsóttri Sögugöngu sem haldin var þann 17. september 2025 í tilefni af 60 ára vígsluafmæli Háteigskirkju á aðventu 1965. Pétur minntist í erindinu á áhugaverða tengingu sem hugsanlega skýrir að einhverju leyti hin býsönsku áhrif sem greina má í arkítektúr Háteigskirkju. Tengingin sem Pétur fjallaði um er sú staðreynd að Dr. Selma Jónsdóttir (fullu nafni Sigþrúður Selma Jónsdóttir), systir Halldórs, og fyrsti forstöðumaður Listasafns Íslands, varði doktorsritgerð sína við Háskóla Íslands árið 1960. Doktorsritgerðin nefndist „Byzönsk dómsdagsmynd í Flatatungu“ en í ritgerðinni rökstuddi hún þá kenningu að útskornar fjalir úr Flatatungu hefðu upprunalega verið hluti af dómsdagsmynd í býzönskum stíl frá miðöldum. Þar sem Selma vann ritgerðina árin sem hugmyndavinna um Háteigskirkju var í þróun er sú hugmynd ritgerðarefni Selmu systur Halldórs hafi að einhverju leyti ratað inn í hugmyndir hans um hönnun kirkjunnar áhugaverð tilgáta. Vert er að taka fram að Selma var fyrsta íslenska konan til að hljóta doktorsgráðu. Hún var fyrsti og eini starfsmaður Listasafns Íslands 1950 og fyrsti forstöðumaður Listasafnsins frá 1960. Selma var sæmd, fyrir embættis- og fræðistörf sín, riddarakrossi hinnar íslensku fálkaorðu árið 1979 og hlaut jafnframt önnur norræn heiðursmerki.
Safnaðarheimilið við kirkjuna var teiknað af syni Halldórs, Garðari Halldórssyni (f. 1942) fyrrum húsameistara ríkisins. Safnaðarheimilið var reist árið 1992.
Arkítektar Háteigskirkju
Halldór H. (Haukur) Jónsson var arkítekt og viðskiptamaður sem oft var nefndur “stjórnarformaður Íslands” sökum setu hans í stjórn fjölda stórra íslenskra fyrirtækja.
Halldór nam arkítektúr við Konunglega tækniskólann í Stokkhólmi og lauk þaðan námi árið 1938. Hann hélt þá aftur til Íslands og hóf störf við Verkfræðistofu Sigurðar Thoroddsen en stofnaði ári síðar eigin arkítektastofu. Halldór giftist Margréti Þ. Garðarsdóttur, dóttur stórkaupmannsins Garðars Gíslasonar, árið 1940 og hóf störf við fyrirtæki tengdaföður síns, G. Gíslason & Hay (síðar Garðar Gíslason hf.). Samfara þeim störfum kynntist Halldór efnuðum mönnum í íslensku viðskiptalífi, m.a. Sveini Valfells og Ingólfi á Hellu.
Halldór þótti lausnamiðaður og úrræðagóður og fékk í framhaldi sæti í stjórn fyrirtækja á vegum Garðars og fleiri viðskiptamanna. Halldór var stjórnarformaður Sameinaðra verktaka, stofnað 1954, og átti helmingseign í verktakafyrirtækinu Íslenskir aðalverktakar. Þáverandi forstjóri Íslenskra aðalverktaka og góðkunningi Halldórs, Geir Hallgrímsson, varð síðar forsætisráðherra Íslands. Halldór sat í stjórn Eimskipafélags Íslands frá 1965 og var stjórnarformaður 1974 til dauðadags. Þá sat hann í stjórn Áburðarverksmiðjunnar í Gufunesi árin 1960-78 og árin 1952-79 í stjórn Vinnuveitendasambands Íslands.
Halldór hefur verið nefndur einn helsti áhrifavaldur í íslensku athafnalífi á 20. öld samfara því að hafa verið kunnur arkítekt, en hann teiknaði ýmsar þjóðþekktar byggingar auk Háteigskirkju. Má þar nefna Watergate bygginguna (höfuðstöðvar Íslenskra aðalverktaka), Hótel Sögu, Vörugeymslur Eimskips við Sundahöfn, Rannsóknarstofnun sjávarútvegsins (nú Hafrannsóknarstofnun & Sjávarútvegsráðuneytið), Domus Medica, Hótel Borgarnes ofl.
Sonur Halldórs, Garðar Halldórsson fæddist og ólst upp í Reykjavík. Hann lauk stúdentsprófi frá MR 1962, en í framhaldi stundaði Garðar nám í arkitektúr við Rheinisch-Westfälische Technische Hochschule í Aachen í Þýskalandi 1962-68 og lauk prófum þaðan 1968. Auk þess að hafa teiknað safnaðarheimili Háteigskirkju er Garðar kunnur fyrir að vera arkítket Flugstöðvar Leifs Eiríkssonar og Reykholtskirkju, en að auki kom hann að endurgerð Bessastaðastofu.